Canllaw Rhaglen Llwybr 2 2023

Rhaid i brosiectau Llwybr 2 gyd-fynd ag o leiaf un o themâu Taith. Mae’r themâu ar gyfer galwad cyllid Llwybr 2 (2023) i’w gweld isod. 

Gosodir y themâu’n flynyddol a gallant newid yn y dyfodol. 

Datblygiadau ym maes addysg

Dylai prosiectau dan y thema hon gyd-fynd â datblygiad perthnasol sy’n digwydd o fewn sector y sefydliad sy’n cyflwyno cais. Os yw prosiectau ar draws sectorau, gall ymgeiswyr ddewis cyd-fynd â pha un bynnag sydd fwyaf perthnasol ar gyfer eu prosiect:

• Cwricwlwm i Gymru 
• Strategaeth Gwaith Ieuenctid Cenedlaethol Cymru (gan gynnwys gwaith y Bwrdd Gweithredu Gwaith Ieuenctid Strategol)
• Y Comisiwn Addysg Drydyddol ac Ymchwil (gan gynnwys y weledigaeth a’r dyletswyddau strategol ar gyfer y sector Addysg Oedolion)

Amrywiaeth a Chynhwysiant

Gallai enghreifftiau o fewn y thema hon gynnwys (ond heb eu cyfyngu i):

• Dwyieithrwydd, amlieithrwydd a diwylliant Cymru
• Hunaniaeth a pherthyn
• Anghydraddoldeb, mynediad a chynhwysiant cymdeithasol 

Newid yn yr Hinsawdd

Gallai enghreifftiau o fewn y thema hon gynnwys (ond heb eu cyfyngu i):

• Datblygiadau ym maes addysg newid yn yr hinsawdd
• Datgarboneiddio
• Addasu a Lliniaru

Ffocws Llwybr 2 yw creu allbynnau prosiect o ansawdd uchel, ardrawiadol, mesuradwy, ac sydd o werth i sefydliadau eraill a’r sector(au) ledled Cymru.

Mae Taith yn agored i arloesedd a syniadau newydd ac mae’n croesawu ac yn annog sefydliadau sy’n gwneud cais i gynnig yr allbynnau prosiect sy’n gweithio orau iddyn nhw a’u sector. Gall allbynnau prosiect ddod mewn fformatau amrywiol megis ysgrifenedig, gweledol, fideo, gweithdai ac ati. Gallai enghreifftiau o allbynnau prosiect gynnwys (ond heb eu cyfyngu i): 

• Modelau neu ddulliau newydd 
• Adnoddau/pecynnau cymorth
• Deunyddiau hyfforddi/addysgu
• Adnoddau/allbynnau digidol

Agwedd allweddol ar Lwybr 2 yw’r gofyniad bod allbynnau prosiect yn cael eu rhannu a’u lledaenu. Bydd angen i sefydliadau sy’n gwneud cais ddangos yn glir sut maent yn bwriadu rhannu canlyniadau eu prosiect, a gyda phwy. Rhaid i’r gweithgaredd lledaenu fod yn briodol ac yn hygyrch i’r sector(au), ac yn berthnasol i fformat a bwriad allbwn y prosiect. Gallai enghreifftiau o weithgareddau lledaenu gynnwys (ond heb eu cyfyngu i):

• Digwyddiad/cynhadledd/gweithdy
• Rhannu adnoddau drwy blatfform ar-lein, neu drwy ap (*sylwch na all Taith dalu costau cynnal megis ffi blynyddol i gadw’r adnodd)
• Sesiynau hyfforddi i unigolion/sefydliadau allu datblygu gwybodaeth a dealltwriaeth