Cymhwysedd cyllid Llwybr 2 Taith

Pwy all wneud cais

Gallwn ni dderbyn ceisiadau gan sefydliadau nid er elw os ydyn nhw’n bodloni’r meini prawf cymhwysedd y sector yn adran 2.1 y canllaw Llwybr 2, gan gynnwys:

1. elusennau cofrestredig neu sefydliadau elusennol corfforedig
2. cwmnïau nid er elw neu gwmnïau budd cymunedol
3. cymdeithasau anghorfforedig
4. ysgolion yng Nghymru (gweler canllaw’r rhaglen ar gyfer canllawiau cymhwysedd llawn)
5. colegau yng Nghymru (gweler canllaw’r rhaglen ar gyfer canllawiau cymhwysedd llawn)
6. awdurdodau lleol yng Nghymru (gweler canllaw’r rhaglen ar gyfer canllawiau cymhwysedd llawn)
7. cyrff statudol eraill yng Nghymru fel byrddau iechyd

Os ydych chi’n sefydliad wedi’ch rhestru ym mhwyntiau 1-3 uchod neu fath arall o sefydliad nid er elw cymwys nad yw wedi’i restru, mae’r meini prawf cymhwysedd hefyd yn berthnasol i’ch sefydliad. Rhaid iddo:

• fod wedi’i sefydlu ac yn masnachu am isafswm o 12 mis a bod yn gallu darparu’r set ddiweddaraf o gyfrifon blynyddol
• bod ag isafswm o 2 ymddiriedolwr neu gyfarwyddwr
• bod â dogfen lywodraethu fel cyfansoddiad, erthyglau cymdeithasu neu weithred (bydd gofyn i chi ei darparu os nad ydych chi wedi gwneud hynny o fewn y 12 mis diwethaf neu os yw’r ddogfen wedi newid ers i chi ei chyflwyno ddiwethaf)

Rhaid i bob sefydliad sy’n gwneud cais fod â phrofiad diweddar, y gellir ei ddangos, o gyflawni gweithgaredd yng Nghymru o fewn y sector y maent yn gwneud cais iddo.

Pwy na all ymgeisio

Dydyn ni ddim yn derbyn ceisiadau gan:

• unigolion
• masnachwyr unigol
• sefydliadau er elw gan gynnwys cwmnïau wedi’u cyfyngu gan gyfranddaliadau
• sefydliadau nad ydynt wedi cael unrhyw weithgarwch diweddar yng Nghymru ac o fewn y sector y maent yn dymuno gwneud cais amdano (e.e. ni all sefydliad nad yw wedi cael unrhyw weithgareddau ieuenctid yng Nghymru wneud cais am gyllid yn y sector Ieuenctid)
• ysgolion, colegau, addysg bellach a sefydliadau addysg a hyfforddiant galwedigaethol sydd wedi’u lleoli y tu allan i Gymru
• sefydliadau sydd wedi’u sefydlu ac yn masnachu am lai na 12 mis
• prifysgolion yng Nghymru (dim ond am gyllid Llwybr 1 y gall prifysgolion yng Nghymru wneud cais)