Profiad diwydiant trawsnewidiol Prifysgol Cymru Y Drindod Dewi Sant i fyfyrwyr Teithio a Thwristiaeth

Ym mis Mai 2025, aeth grŵp o fyfyrwyr Rheoli Teithio a Thrafnidiaeth Rhyngwladol ar brofiad dysgu rhyngwladol trawsnewidiol yn Fflorida. Drwy bartneriaethau cryf â’r diwydiant ac integreiddio academaidd wedi’i gynllunio’n ofalus, galluogodd y prosiect fyfyrwyr i ymgysylltu’n uniongyrchol ag arweinwyr byd-eang yn y diwydiannau teithio, twristiaeth a lletygarwch, gan gynnwys Disney, Universal, Royal Caribbean, a Marriott.

Beth oedd nod eich prosiect?

Prif nod y daith oedd dod â dysgu academaidd yn fyw drwy drochi myfyrwyr mewn profiad ‘Byw, Dysgu, Gweithio’, yn arddull Disney. Dyluniwyd y prosiect i:

• Alinio’n uniongyrchol â modiwlau academaidd y myfyrwyr mewn rheoli atyniadau a digwyddiadau.
• Darparu dysgu profiadol sy’n cysylltu damcaniaeth â gweithrediadau yn y byd go iawn.
• Annog datblygiad personol, hyder, a dinasyddiaeth fyd-eang.

Roedd y weledigaeth yn syml ond yn bwerus: gwneud y byd yn ddarlithfa.

Dywedwch wrthym am rai o’r gweithgareddau buodd eich cyfranogwyr yn cymryd rhan ynddynt?

Mae ein myfyrwyr yn ymgymryd â hyfforddiant diwydiant teithio tystysgrifedig cyn y daith sy’n eu helpu i baratoi ar gyfer y daith.  Roedd hwn yn brofiad newydd i fyfyrwyr nad oeddent wedi teithio heb eu teulu o’r blaen, ac i un dysgwr dyma’r tro cyntaf iddo adael Cymru a mynd dramor ar awyren.

Roedd myfyrwyr yn byw gyda’i gilydd mewn fila fawr, gan annog dysgu grŵp a chydweithio.  Roedd yr amgylchedd cymunedol yn meithrin cefnogaeth gan gyfoedion ac annibyniaeth, gyda myfyrwyr yn siopa, yn coginio, ac yn cynnal sesiynau trafod academaidd dyddiol cyn ac ar ôl ymweliadau.

Roedd gweithgareddau dysgu allweddol yn cynnwys:

• Ymweld â holl barciau thema Disney ac Universal i ddadansoddi gwasanaethau gwesteion, rheoli atyniadau, a strategaethau gweithredol yn feirniadol.
• Teithiau y tu ôl i’r llenni, ymweliadau â safleoedd gwestai, a sesiwn addysgol yng nghampws myfyrwyr Disney.
• Trên cyflymder uchel i Miami, gan gynnwys ymweliadau ag ardaloedd amlddiwylliannol a mynychu rodeo traddodiadol i archwilio twristiaeth ddiwylliannol.
• Ymweliad ar long Celebrity Cruises, lle cyfarfu myfyrwyr â’r Uwch Reolwr Teithiau Glannau ac archwilio gweithrediadau mordaith yn fanwl.

Creodd myfyrwyr ddyddiaduron fideo a myfyrdodau diwylliannol hefyd, a chafodd llawer ohonynt eu dal gan ddefnyddio camerâu 360 gradd i’w rhannu yn ystafell addysgu ymdrochol y brifysgol.

Mae effaith don y prosiect wedi ymestyn y tu hwnt i’r cyfranogwyr uniongyrchol:

• Mae darlithwyr bellach yn defnyddio’r cynnwys 360 gradd i gefnogi cyflwyno’r cwricwlwm ehangach.
• Mae’r delweddau ymdrochol wedi’u hintegreiddio i wythnosau a seminarau cynefino, gan fod o fudd i fyfyrwyr eraill trwy annog trafodaeth feirniadol a dysgu myfyriol.
• Mae cynnydd amlwg wedi bod yn niddordeb myfyrwyr mewn lleoliadau rhyngwladol a theithiau maes ar draws rhaglenni Twristiaeth a Digwyddiadau y brifysgol.

Un llwyddiant arwyddocaol oedd y gallu i gynnwys myfyriwr â phroblemau symudedd ym mhob agwedd ar y profiad. Gyda chyllid ychwanegol gan Taith, llogwyd sgwter symudedd, gan sicrhau mynediad llawn i bob gweithgaredd dysgu. Roedd hyn o fudd uniongyrchol i’r myfyriwr ond fe greodd hefyd drafodaethau grŵp ystyrlon ynghylch hygyrchedd, cydraddoldeb a chynhwysiant yn y diwydiant teithio a digwyddiadau.

Darparodd y daith ryngwladol hon lawer mwy na chyfoethogi academaidd; datblygodd hyder ac ysbrydoliaeth, ac agorodd ddrysau i gyfleoedd gyrfa. Dychwelodd y myfyrwyr wedi’u cyfarparu’n well yn academaidd, ond hefyd wedi’u trawsnewid yn bersonol ac yn awyddus i ymgysylltu â chyfleoedd byd-eang.

Beth yw eich myfyrdodau ar eich profiad Taith?

A fyddech chi’n argymell Taith i eraill?

Heb os nac oni bai. Ein cyngor ni fyddai: cynlluniwch yn drylwyr, cysylltwch y daith yn glir â chanlyniadau dysgu, a pharatowch y myfyrwyr ymlaen llaw i gael y gorau ohoni. Mae hyfforddiant cyn y daith ac amcanion clir yn allweddol.