Taith Llwybr 1 - Symudedd cyfranogwyr - 2026

Symudedd Grwp

Mae symudedd grŵp yn gyfle i grwpiau o o leiaf 3 o fyfyrwyr gael profiad o gyfnewid dysgu rhyngwladol, ynghyd â staff a all eu cefnogi ac arwain y profiad dysgu. Rhaid i ddarlithwyr neu staff cymwys eraill o’r SAU fynd â’r myfyrwyr drwy gydol y gweithgaredd. Os oes angen, gall oedolion eraill hefyd weithredu fel pobl sy’n cyd-fynd i gefnogi’r darlithwyr sy’n cyd-fynd. Rhaid i weithgareddau gynnwys canlyniadau dysgu wedi’u diffinio’n glir a dylen nhw ganolbwyntio ar brofiadau, gwybodaeth a sgiliau’r cwricwlwm academaidd. Gall y dysgu fod yn ffurfiol neu’n anffurfiol ond rhaid iddo gynnwys cyfnewid a chydweithio â chyfoedion o SAU neu sefydliad partner rhyngwladol, gan alluogi myfyrwyr i ddatblygu sgiliau, cymwyseddau, ymwybyddiaeth a dealltwriaeth ryngddiwylliannol.

Nid yw symudedd nad yw’n cynnwys cyfnewid â chyfoedion o wlad/gwledydd arall yn gymwys i gael cyllid.

Symudedd Unigol

Mae gweithgaredd symudedd unigol (sy’n dwyn credyd neu ddim yn dwyn credyd) yn gyfle i gyfranogwr unigol gael profiad dysgu annibynnol wedi’i deilwra’n bersonol drwy weithgaredd cyfnewid dysgu rhyngwladol. Dylai’r gweithgareddau symudedd hyn ganolbwyntio ar brofiadau, gwybodaeth a sgiliau’r cwricwlwm academaidd. Gall y dysgu fod yn ffurfiol neu’n anffurfiol, ond rhaid cynnwys cyfnewid a chydweithrediad, gyda dysgwyr yn gweithio ar y cyd â chymheiriaid o sefydliad partner rhyngwladol i ddatblygu sgiliau, cymwyseddau, ymwybyddiaeth a dealltwriaeth ryngddiwylliannol. Gan na fydd neb yn mynd gyda’r dysgwyr ar y symudedd, rhaid datblygu rhaglen ddysgu wedi’i theilwra ar gyfer pob dysgwr, rhaid darparu hyfforddiant cyn gadael, a rhaid gwneud trefniadau cymorth parhaol gyda’r sefydliad partner rhyngwladol ar gyfer hyd y gweithgaredd symudedd.

Nid yw gweithgareddau symudedd nad ydynt yn cynnwys gweithgaredd cyfnewid gyda chymheiriaid o wlad/wledydd eraill yn gymwys am gyllid.

Symudedd Tymor Byr Cyfunol

Mae symudeddau tymor byr cyfunol yn rhoi cyfle i fyfyrwyr gymryd rhan mewn cyfnewidiadau dysgu rhyngwladol byrrach a hygyrch. Mae’r symudeddau hyn ar agor i bob myfyriwr cymwys, ond maen nhw’n benodol i agor symudedd rhyngwladol i’r myfyrwyr hynny sy’n wynebu rhwystrau i gymryd rhan mewn symudeddau tymor hwy, er enghraifft oherwydd cyfrifoldebau gofalu.

Rhaid i symudeddau tymor byr cyfunol gynnwys elfen rithwir orfodol. Gall yr elfen rithwir ddigwydd cyn, ar ôl, neu cyn ac ar ôl, y symudedd corfforol. Rhaid i weithgareddau rhithwir ategu/datblygu’r gweithgareddau a wneir fel rhan o’r symudedd corfforol. Rhaid i’r elfen(nau) rithwir ddod â dysgwyr o’r SAU yng Nghymru a’r sefydliad(au) partner ynghyd i weithio ar yr un pryd ar weithgareddau a rennir.

Rhaid i’r SAU yng Nghymru a’r sefydliad partner rhyngwladol gael cytundeb ysgrifenedig ar y gweithgareddau i’w gwneud gan y myfyriwr(wyr) cyn i’r symudedd ddigwydd. Rhaid i bob symudedd gynnwys canlyniadau addysgol wedi’u diffinio’n glir sy’n manylu ar y sgiliau/datblygiad personol a gynlluniwyd, a’r effaith ddisgwyliedig ar gyfer y dysgwyr.

Gall myfyrwyr gymryd rhan fel rhan o symudedd grŵp, neu fel unigolyn, ar yr amod bod y gofynion canlynol yn cael eu bodloni:

Symudeddau tymor byr cyfunol unigol

Rhaid i’r symudeddau fod yn gysylltiedig â’r cwrs ac yn ystyrlon yn academaidd, gan ddarparu gwerth ychwanegol i’r myfyriwr. Rhaid i’r gweithgareddau ddarparu dysgu a gydnabyddir gan y sefydliad cartref ac ategu’r cwrs/hyfforddiant mae’r cyfranogwr yn ymgymryd ag ef.

Symudeddau tymor byr cyfunol grŵp

Gall symudeddau grŵp un wythnos fod naill ai’n gysylltiedig ag agweddau academaidd/cwrs, neu’n gyfnewid dysgu diwylliannol. Os yw’n gysylltiedig ag agweddau academaidd/cwrs, rhaid i’r gyfnewid ddarparu gwerth ychwanegol i’r myfyriwr. Rhaid i’r gweithgareddau ddarparu dysgu a gydnabyddir gan y sefydliad cartref ac ategu’r cwrs/hyfforddiant mae’r cyfranogwyr yn  ymgymryd ag ef.

Os yw’r gyfnewid yn gyfle diwylliannol/dysgu:

• rhaid i’r staff o’r SAU yng Nghymru hwyluso’r dysgu.
• rhaid i gyfranogwyr o SAU yng Nghymru gymryd rhan mewn gweithgareddau cyfnewid dysgu gyda chyfoedion o’r sefydliad partner.

Gweithgareddau anghymwys:

• symudeddau unigol neu grŵp sydd ddim yn gysylltiedig â chyrsiau academaidd/ac sydd ddim yn cynnig gwerth academaidd na dysgu a gydnabyddir gan y sefydliad cartref
• gwirfoddoli
• symudeddau heb ganlyniadau dysgu wedi’u diffinio’n glir
• gweithgareddau goddefol yn bennaf fel gwrando ar ddarlithoedd, areithiau neu fynychu cynadleddau neu symudeddau sy’n cynnwys gweithgareddau diwylliannol yn unig

Cyfnewidiadau Rhithwir Grwpiau

Gallwch chi wneud cais am gyfnewid grŵp rhithwir pan fydd cyfiawnhad clir nad yw’n bosib nac ymarferol i’r cyfranogwyr deithio. Ni ddylech chi ddefnyddio cyfnewidiadau rhithwir a draul symudedd corfforol yn achos y cyfranogwyr hynny sydd angen cefnogaeth a chyllid ychwanegol i allu cymryd rhan. Rhaid i sefydliadau sy’n gwneud cais egluro yn eu ceisiadau pam mai symudedd hollol rithwir, an-gorfforol yw’r unig opsiwn i’w dysgwyr.

Dylai’r cyfnewid rhithwir alluogi dysgwyr i brofi cyfnewid rhyngwladol, cyfathrebu â chyfoedion o sefydliad partner rhyngwladol a gweithio ochr yn ochr â nhw, a datblygu sgiliau, gwybodaeth a dealltwriaeth.

Rhaid i staff y sefydliad arwain y profiad dysgu am hyd cyfan y gweithgaredd.

Lle mae sefydliadau’n gweithio gyda grŵp o ddysgwyr gan gynnwys y rhai sy’n gallu teithio a’r rhai sy’n methu â theithio, gallan nhw wneud cais am symudeddau grŵp a symudeddau rhithwir i ddarparu cyfleoedd i bob cyfranogwr yn y grŵp.

Cysgodi Swydd a Lleoliadau

Lleoliadau addysgu ar gyfer staff academaidd mewn unrhyw faes astudio i addysgu a chydweithio mewn sefydliad partner dramor. Gall lleoliadau addysgu academaidd hefyd gynnwys darparu hyfforddiant ar gyfer datblygiad y sefydliad partner mewn maes penodol.

Bydd cysgodi swyddi yn cynnwys cyfleoedd symudedd i staff gwasanaethau academaidd neu broffesiynol ymgymryd â symudedd cysgodi swyddi, gan hwyluso arfer gorau, cyfnewid gwybodaeth, datblygu gyrfa a datblygiad proffesiynol parhaus.

Gallwch chi gyfuno lleoliadau a chysgodi swyddi yn ystod un cyfnod dramor.

Cyrsiau Hyfforddi a Datblygiad Proffesiynol

Cyllid i gyfranogwyr gael mynediad at gwrs strwythuredig neu fath tebyg o hyfforddiant a ddarperir gan weithwyr proffesiynol cymwysedig ac sy’n seiliedig ar raglen ddysgu a deilliannau dysgu a ddiffiniwyd ymlaen llaw. Rhaid i’r hyfforddiant gynnwys cyfranogwyr o ddwy wlad wahanol o leiaf ac mae’n rhaid i’r cyfranogwyr allu rhyngweithio â dysgwyr eraill a gyda’r hyfforddwyr. Nid yw gweithgareddau sy’n oddefol gan bennaf yn gymwys, megis gwrando ar ddarlithoedd, areithiau neu fynd i gynadleddau.

Lleoliadau ymchwil, partneriaethau a chydweithio

Bydd y gweithgaredd hwn yn cefnogi symudedd staff cymwys sy’n canolbwyntio ar ymchwil gan gynnwys myfyrwyr ymchwil ôl-raddedig, ymchwilwyr ôl-ddoethurol ac ymchwilwyr sydd ar ddechrau eu gyrfa, staff ymchwil sefydledig a staff cymorth ymchwil.

Bydd y gweithgaredd hwn yn hyrwyddo cyfnewid gwybodaeth, creu partneriaethau newydd a chryfhau cysylltiadau ymchwil rhwng staff ymchwil mewn SAU yng Nghymru a’u cyfoedion rhyngwladol.

Gall cyfranogwyr ddymuno:

• cydweithio ar gynigion ymchwil neu bapurau ar y cyd ag ymchwilwyr mewn sefydliadau partner dramor
• ymgymryd â lleoliadau ymchwil a secondiadau
• sefydlu cyfleoedd newydd ar gyfer cydweithio
• cymryd rhan mewn gweithgareddau cydweithredol a/neu waith maes, gan gynnwys cael mynediad at gyfleusterau, seilwaith ac offer arbenigol.
• ymgysylltu mewn cyfleoedd rhwydweithio a datblygu ymchwil gan gynnwys trwy gyflwyno seminarau cydweithredol, gweithdai a hyfforddiant ymchwil

Rydyn ni’n annog sefydliadau i hyrwyddo’r gweithgaredd hwn ymhlith myfyrwyr ymchwil ôl-raddedig ac ymchwilwyr gyrfa gynnar yn arbennig.

Dylai ffocws symudeddau Ymchwil a ariennir gan Taith fod ar ddarparu cyfleoedd i fyfyrwyr ôl-raddedig ac ymchwilwyr gyrfa gynnar. Nid oes angen i ymgeiswyr ddangos effaith y symudeddau hyn ar fyfyrwyr israddedig.

Ymweliadau paratoadol

Ymweliadau â phartneriaid rhyngwladol newydd neu bresennol i gefnogi teithiau arfaethedig neu barhaus o fewn yr un cais. Rhaid i bob ymweliad paratoadol fod â sail resymegol glir a rhaid iddo wella cynhwysiant, cwmpas ac ansawdd gweithgareddau symudedd. Er enghraifft, gellir trefnu ymweliadau paratoadol i helpu i baratoi ar gyfer symudedd cyfranogwyr ag anghenion ychwanegol, i ddechrau gweithio gyda sefydliad partner newydd neu i baratoi symudedd am gyfnod hwy. Gellir eu trefnu hefyd i ddarparu cymorth i ddysgwyr ar symudedd unigol tymor hwy. Gellir trefnu ymweliadau paratoadol i baratoi ar gyfer unrhyw fath o symudedd dysgwyr, ac ar gyfer symudedd staff lle mae sail resymegol glir.  Rhaid cwblhau’r ymweliad paratoadol cyn i’r dysgwr neu’r staff symud i fod yn berthnasol iddo.  Yr unig eithriad fyddai ymweliadau cymorth bugeiliol â symudedd dysgwyr unigol hirdymor.

Bydd Taith yn ariannu hyd at uchafswm o dri ymweliad paratoadol fesul cais a hyd at uchafswm o ddau gyfranogwr fesul ymweliad. Mewn amgylchiadau eithriadol, gall sefydliadau sy’n gwneud cais ofyn am fwy na dau gyfranogwr ar gyfer pob ymweliad lle darperir rhesymeg a chyfiawnhad clir.

Rhaid i’r gweithgaredd y bwriedir i’r ymweliad(au) paratoadol ei gefnogi hefyd gael ei gynnwys yn y cais.

Symudedd Mewnol

Gallwch chi wneud cais am 30% ychwanegol o’r cyllid y gofynnwch chi amdano ar gyfer gweithgareddau symudedd allanol i ddod â phobl i Gymru. Mae gwybodaeth am sefydliadau partner rhyngwladol yn adran 4.2.2.

Mae pob symudedd a ddiffinnir fel symudedd allanol cymwys hefyd yn gymwys ar gyfer symudedd mewnol. Mae’r holl gyfyngiadau a gofynion yr un fath ar gyfer symudedd mewnol ag ar gyfer symudedd allanol.